कधी मिळणार आम्हाला न्याय? लि.ओ.डीआर (L.O.DR) आणि पी.टी.डी आर (P.T.DR) कर्मचाऱ्यांचा एल्गार

महापालिका कामगारांच्या हक्कांसाठी ‘लि.ओ.डीआर L.O.DR & पी.टी.डी आर P.T.DR संघर्ष समिती’ व्हॉट्सॲप ग्रुपने आयोजित केलेली एक महत्त्वाची बैठक ७ ऑगस्ट २०२५ रोजी मुंबई मराठी ग्रंथ संग्रहालय,दादर येथे पार पडली.या बैठकीला ११७ कर्मचाऱ्यांनी उत्स्फूर्तपणे प्रतिसाद दिला, ज्यामुळे आयोजकांना सुखद धक्का बसला. कामाच्या व्यस्ततेतून वेळ काढून एवढ्या मोठ्या संख्येने कर्मचारी उपस्थित राहिल्याने आपल्या हक्कांसाठी एकत्र येण्याची त्यांची तीव्र इच्छाशक्ती दिसून आली.

या बैठकीच्या अध्यक्षपदी श्री.गि.स.गं.पवार यांची निवड सर्वानुमते करण्यात आली. बैठकीच्या सुरुवातीला अनेक कर्मचाऱ्यांनी लि.ओ.डीआर L.O.DR आणि पी.टी.डी आर P.T.DR म्हणून काम करताना आलेले अनुभव आणि त्यांच्यावर होणारे अन्याय मांडले. काही कर्मचाऱ्यांनी नुकत्याच झालेल्या कामगार करारावरही आपले विचार मांडले आणि सध्या कार्यरत असलेल्या मोटर लोडर कामगारांवर अन्याय होऊ नये, अशी अपेक्षा व्यक्त केली. या करारामुळे मोटर लोडर कामगारांवर कामाशिवाय बसण्याची वेळ येण्याची त्यांनी चिंता व्यक्त केली.

प्रमुख मागण्या आणि एकजुटीचा निर्धार

या बैठकीत अनेक सुशिक्षित आणि जागरूक कर्मचाऱ्यांनी पुढाकार घेऊन आपले विचार मांडले. रणधीर आल्हाट यांनी एकत्र राहून न्याय मिळवण्याचं महत्त्व पटवून दिलं, तर सुनील यादव यांनी शिक्षणाचं महत्त्व सांगून कामगार संघटित झाल्यास मोठा बदल घडवता येऊ शकतो, हे स्पष्ट केलं. विजय सोनवणे यांनी यापूर्वीही असे प्रयत्न अयशस्वी झाल्याचं नमूद करत, आता KVSS कंत्राटी कामगारांमुळे आपल्याला एक मोठी संधी मिळाली आहे, असं सांगितलं. त्यांना १९८७ आणि १९९० च्या परिपत्रकानुसार लाभ मिळू शकतो, तर तो आपल्यालाही मिळायलाच हवा,असा जोरदार युक्तिवाद त्यांनी केला.

बैठकीच्या शेवटी,अध्यक्ष गितेश पवार यांनी २८ जुलै २०२५ रोजी महापालिका आणि कामगार संघटनांमध्ये झालेल्या करारावर तीव्र आक्षेप घेतला. हा करार कामगारांना विश्वासात न घेता करण्यात आल्याने समितीचा त्याला विरोध आहे, असं त्यांनी स्पष्ट केलं. ज्या विषयावर आंदोलन करायला घेतलं होतं, तोच विषय अर्धवट सोडून दिला गेला. कामगार संघटनांना अनेक वर्षांनी एक संधी मिळाली होती, पण त्याचा योग्य वापर झाला नाही,असं ते म्हणाले.

गितेश पवार यांनी कामगारांच्या हिताच्या काही महत्त्वाच्या मागण्याही मांडल्या:सेवा नियमित करणे: पी.टी.डी आर P.T.D.R. आणि लि.ओ.डीआर L.O.D.R. कर्मचाऱ्यांना त्यांच्या प्रथम नियुक्तीच्या तारखेपासून सेवेत कायम करण्यात यावं.समान न्यायाची मागणी: KVSS कंत्राटी कामगारांना जो न्याय मिळाला, तोच न्याय महापालिकेने नियुक्त केलेल्या सर्व खाडा बदली कामगारांनाही मिळायला हवा.

कंत्राटीकरणाला विरोध: महापालिका कामगार स्वच्छता राखण्यासाठी पूर्णपणे सक्षम आहेत. कंत्राटदारांच्या गाड्यांवर आज जेवढे कायमस्वरूपी कामगार आहेत, तेवढेच पुढेही नेमावेत. कंत्राटी कामगारांना मदतनीस म्हणून ठेवण्यास विरोध नाही.मालकी हक्काची घरे: वर्षानुवर्षे सेवा देणाऱ्या सफाई कामगारांना मुंबईतच मालकी हक्काची घरे आणि म्हाडा-SRA प्रकल्पांमध्ये सवलतीच्या दरात घरे उपलब्ध करून द्यावीत.जुनी पेन्शन योजना: सफाई कामगारांना त्यांच्या कामाचे स्वरूप पाहता जुनी पेन्शन योजना लागू करावी.प्रशासनाच्या दिरंगाईमुळे ज्या कर्मचाऱ्यांचे पालक २००८ पूर्वी निवृत्त झाले, पण ज्यांना वारसा हक्काने १ मे २००८ नंतर नोकरी मिळाली आहे, अशा कर्मचाऱ्यांसाठीही जुनी पेन्शन योजना लागू करावी.

संघर्षासाठी पुढील पाऊल: सह्यांची मोहीम

बैठकीत केवळ मागण्या मांडल्या गेल्या नाहीत, तर त्या पूर्ण करण्यासाठी एक ठोस रणनीतीही ठरवण्यात आली. या कराराला अधिक प्रभावीपणे विरोध दर्शवण्यासाठी आणि आपल्या मागण्या प्रशासनापर्यंत पोहोचवण्यासाठी प्रत्येक वॉर्डात सह्यांची मोहीम राबवण्याचा विचार मांडण्यात आला. जर सर्व कामगार वर्ग या मोहिमेसाठी तयार असेल, तर या सह्यांच्या आधारे सन्माननीय महापालिका आयुक्तांना एक निवेदन सादर करण्यात येईल.या निवेदनाद्वारे,आयुक्तांनी या कामगार करारावर पुनर्विचार करावा आणि कामगारांना न्याय मिळवून द्यावा,अशी जोरदार मागणी केली जाईल.या मोहिमेमुळे कामगारांची एकजूट आणि त्यांच्या मागण्यांची ताकद प्रशासनाला दाखवून देता येईल.

यावेळी कामगारांना मार्गदर्शन करताना पवार म्हणाले की, कोणत्याही युनियनचा घाईगडबडीने राजीनामा न देता,किंवा त्यांच्या झेंड्यांची तोडफोड न करता,त्यांचा सन्मान करून त्यांना बाजूला ठेवा.तुम्हाला युनियन नको असल्यास पगारामधून युनियनची वर्गणी कापली जाऊ नये यासाठी प्रयत्न करा,ज्यामुळे प्रत्येक युनियन तुमच्यापर्यंत पोहोचेल,असे आवाहन त्यांनी केले.

संघर्ष समितीने सर्व उपस्थितांचे आभार मानले.आता पुढील लढ्यासाठी सज्ज होऊन, नियोजित कार्यक्रम आखून ही लढाई पुढे नेण्याचा निर्धार बैठकीत व्यक्त करण्यात आला.या महत्त्वपूर्ण बैठकीच्या यशस्वी आयोजनात गौतम कांबळे,विजय सोनावणे,ढोबळे, जीतू मोरे,गणेश,प्रमोद गायकवाड,रणधीर आल्हाट,सुनील यादव,सोलंकी,गि.स.गं. पवार,वाघमारे,सातपुते यांसह इतर अनेक कामगारांनी महत्त्वाची जबाबदारी पार पाडली.त्यांच्या अथक प्रयत्नांमुळे आणि मेहनतीमुळे ही बैठक यशस्वी झाली. संघर्ष समितीने या सर्व कार्यकर्त्यांचे आभार व्यक्त केले.

आपल्या संघर्षासाठी, आपल्या एकजुटीचा विजय असो!

                  आयु. गि.स.गं.पवार

                       (ग्रुप ॲडमिन)

“L.O.DR & P.T.DR संघर्ष समिती व्हॉट्सॲप ग्रुप”